中環出更：何志豪嘆保良主席唔易做
保良局董事會尋日換屆，主席何志豪（David）落莊，正式交棒畀做紙業生意嘅呂鈞堯（Quincy）。臨別秋波嘅David談笑風生，慨嘆主席唔易做，佢話咪睇各副主席、總理喺電視機前打扮華麗，其實風光背後付出唔少汗水。
David喺經濟低迷下出任保良一哥，「撲水」難上加難，但佢「吸水力」依然強勁，總善款收入破紀錄高達二億港元。過去一年，David幾乎賣身為保良，佢笑言，雖然未至於「三過家門而不入」，但放喺保良嘅時間仲多過自己間糖果公司，現在落莊後終於鬆一口氣，要多啲返公司開會至得。
「東保是一家」
前主席忙到金睛火眼，擁有一張baby face嘅新主席Quincy就話未驚過，咪睇佢外表年輕，其實已經服務咗保良八年，本身亦係興泰行洋紙有限公司董事，喺商界人脈廣博，「撲水」應該難佢唔到喎。副主席鄭錦鐘（Eric）都讚Quincy年輕有為，魄力十足。
Eric本身人緣都好廣，尋日就職禮獲潮州商會會長許學之到賀，佢拉埋局內「潮州幫」總理合照，包括「玩具大王」蔡志明太太蔡李惠莉及馬清楠，果然同聲同氣。就職禮儀式後，夜晚仲喺會展筵開三十幾席，前東華三院主席兼鐘錶大王孫秉樞都有撐場，何解保良晚宴會有東華嘅人出現呢？
孫秉樞憶述，六年前佢擔任東華主席時，有感華人慈善團體之間無乜往來，於是拉埋當時嘅保良局主席方潤華，創立「東保是一家」理念，提議東華同保良兩邊董事局核心成員每年碰頭一次，於是乎每逢東華或保良嘅董事局就職禮，兩家人都會互訪，傳統至今不變，非常難得。
卓妮