政情：廿蚊張一沉百踩周身蟻

自由黨立法會議員張宇人自從拋出最低工資時薪廿蚊之後，各界對佢嘅攻擊不但無日無之，更加係變本加厲。尋日佢母校男拔萃有學弟參加遊行，除咗要求廿蚊張因為最低工資嘅言論退出校董會，仲連對學校嘅其他不滿，包括校方將健身室拆咗，同埋小食店由家族式營運改由大連鎖店經營，都算到廿蚊張頭上，一沉百踩莫過於此，睇嚟廿蚊張仲有排一身蟻。