政情：徐英偉睇貓紙讀錯字
繼教育局政治助理楊哲安（Jeremy）成功約咗班「八十後」食飯交流後，民政事務局政治助理徐英偉（Caspar）亦笑住話有用facebook同「八十後」、「九十後」傾偈，仲自爆應過網民之約，去睇足球比賽，睇吓球場草地係咪真係咁唔掂喎。
Caspar尋日出席禁毒活動，記者提起Jeremy同「八十後」有聚餐，佢即刻笑住話自己都有用facebook同「八十後」對話，連「九十後」都有添，仲話有主動瀏覽同足球有關嘅網站，睇吓點樣搞起足球壇。Caspar仲話，有網民約佢去睇咗足球賽事，以了解青少年同球迷嘅心聲喎。
Caspar平日低調到大家唔多記得佢，要佢演講佢都有啲生硬，分零鐘嘅講詞都要拎住大大張A4 size嘅「貓紙」出嚟讀，仲將「在座」讀成「昨座」，睇嚟都係要多啲訓練吓喇。