政情：陳巧文上論壇 邊講邊隊啤
近日社運人士去親中聯辦示威、抗議都定必有人被捕。支聯會尋日搞咗個論壇講政治檢控，邀請三位先後因示威行動被檢控嘅「八十後」，包括社運人士陳巧文、FM101創辦人之一嘅梁穎禮同支聯會常委李耀基。
不過，陳巧文同梁穎禮尋日出席論壇唔止雙雙遲到，而且到場時兩人手上都攞住一罐啤酒，發言時仲邊講邊「隊啤」，惹來唔少途人側目。其實陳巧文同梁穎禮都係「八十後」嘅代表人物，依家兩人嘅行為好聽啲講叫率性而為，但畀人嘅實際觀感係唔尊重大會，出席論壇嘅各界人士都唔知當佢哋係「酒後吐真言」好，定還是醉話一番好喇。
講番呢個論壇，台上嗰三位講者都覺得政府對社運人士嘅打壓愈嚟愈激，律政司更儼如「中聯辦」保安，只要社運人士一到中聯辦示威就絕不手軟提出檢控。支聯會將於四月十八日由警察總部遊行到政府總部，抗議政治檢控，身患肺癌嘅支聯會主席司徒華表示會坐輪椅行足全程。