政情：蘇菲梁對80後有微言
經濟動力成員梁劉柔芬（Sophie）及林健鋒（Jeffrey）尋日帶領九十個港大、中大及科大學生，浩浩蕩蕩坐高鐵到韶關考察，參觀一家玩具廠運作以了解港商喺內地嘅工業發展及就業前景。回顧整個考察行程，班「八十後」學生對珠三角發展加深認識，但講到紀律方面，就令Sophie睇唔慣，私底下對呢班青年有啲牢騷。
帶隊上韶關睇廠
話說考察團喺晨早六時三十分出發，但有兩個學生遲到，搞到四十五分先至開車，Sophie就慨嘆依家啲後生仔唔守時，無嚟搭颯。到中午喺韶關玩具廠房工人飯堂午膳，可能少肉多菜唔啱啲學生口味，到飯後參觀玩具廠時，有學生離隊去買朱古力醫肚，搞到Sophie催趕鴨仔咁要學生歸隊，相當勞氣。
不過，Sophie首次坐高鐵好興奮，上車後即時試吓車廂內各種設備，又話坐車期間欣賞到窗外山水風景，稱得上係洗滌心靈之旅喎。同Sophie一齊搭高鐵嘅Jeffrey都好興奮，但談到自由黨「廿蚊張」風波就更加興奮，話今次自由黨處理危機唔係咁好，反應太慢，而且有人退黨又唔認，變成另一危機，加上幾個人出嚟一人講一句，愈描愈黑。
講完舊黨嗰筆，Jeffrey強調大家唔好陰謀論覺得經濟動力想搶自由黨啲黨員，亦唔希望畀人過橋，靠高調過檔攞着數。其實佢咁識計數，都好難搵佢着數喇。