政情：學者同鬍鬚曾反枱

搶閘第四份預算案前公布

預算案一份比一份差，三年來「派糖」差唔多有二千億元，不過「Ｎ無」人士依然活喺水深火熱之中。本港一班經濟學家見鬍鬚曾「等收工」嘅表現真係愈睇愈心寒，為求救港兼自救，聽講佢哋近來埋班準備搞個「民間預算案」，科大經濟系教授雷鼎鳴同浸大經濟系前系主任鄧樹雄都有參與其中。佢哋嘅最終目的，係將「民間預算案」搶先喺鬍鬚曾公布第四份預算案前公布。

其實本地嘅經濟學者一直覺得鬍鬚曾不懂理財、唔識經濟，大家原先以為佢上任之後會慢慢上手，今年應該可以大刀闊斧謀劃吓長遠發展，點知鬍鬚曾竟然放軟手腳，預算案連政府自己提出嘅六大產業會如何發展都冇晒影，大家仲點會奢望佢餘下兩年任期會有突破性表現吖，所以咪發起呢個自救行動囉。

「民間預算案」上月中已經開過一次論壇「試水溫」，睇吓各界反應如何，點知除咗有學者同專業人士參與之外，唔少社福界團體都起晒哄話有興趣，因為佢哋已經信唔過政府有心改善香港貧富懸殊嘅問題，必須出手自救。佢哋先會批判鬍鬚曾過去三份預算案，盡數佢嘅不足之處，唔少人覺得鬍鬚曾冇心又冇諗頭，年年只識「派糖」，做壞手勢，令到下任財政司有跟風壓力，但「派糖」又唔到位，令各階層市民為之氣結。

政府每年制訂預算案時都會請學者、專業人士畀吓意見，但睇鬍鬚曾份預算案就知佢將呢個聽取意見嘅過程當成例行公事，結果好嘅意見就當成耳邊風，最終都係閉門造車，如此剛愎自用，難怪一眾學者會心淡到另起爐灶啦。其實歷任財爺多年以來都有同經濟學者有傾有講，呢班學者如果啱傾嘅都甘願做政府智囊，實為雙贏之局，今次學者同鬍鬚曾反枱，都可謂打破傳統、締造歷史喇。