中環耳目：鏞記老闆教煮鵝肝腸
所謂不時不食，臘肉膶腸絕對係冬天佳品，身為富豪飯堂嘅鏞記，除咗燒鵝出名，用鵝肝做嘅鵝肝腸一樣唔講得笑，閒閒地一日賣百零斤，不過要食鵝肝腸都唔係話想食就有，只係喺中秋前一個星期到清明前後供應，依家供應期仲有幾日，錯過咗就要等中秋。
厚切先好味
擅於將下欄變上菜嘅鏞記老闆甘建成，眼見日日皮脆肉嫩嘅燒鵝都剩番副靚鵝肝，於是發揮創意，將佢變成鵝肝腸，一賣就十幾年。佢哋嘅鵝肝係百分百Made in Hong Kong，所以相當新鮮，加上腸衣夠薄，鵝肝嘅肥瘦分布相當平均，油潤感剛剛好，難怪每年一入冬，就搞到業餘食家葉澍堃心思思，要去歎番吓。
甘老闆教卓妮，鵝肝腸要厚切先好味，一條最多開四就夠啦，煲飯嗰陣見啲飯收水就可以放落去蒸，如果隔水蒸嘅話，十分鐘都夠晒。不過切記蒸之前唔好攞條腸去浸水洗，否則就會變「奀皮」，影響口感。
卓妮