中環出更：邱達根競投國畫心裏有數
近排又係各大拍賣行舉行春季拍賣嘅旺季，卓妮尋日趁復活節最後一日假期，去會議展覽中心睇蘇富比中國近代書畫拍賣，見到嚟尋寶嘅富商邱德根細仔、遠東控股董事總經理邱達根（Duncan）。Duncan曾經舉手競投林風眠畫作，但因價格太高而放棄，仲話一幅畫作過百萬元實在太貴啦！
Duncan除咗同林風眠嘅大作擦身而過，仲點名話趙少昂嘅一幅畫作都以過百萬元成交，超出晒佢嘅預算添！佢心目中嘅靚價係幾十萬元嘅啫！不過佢都知每個人心目中靚畫嘅價錢都唔同，好主觀，所以唔會不惜代價去爭。
黃永光去拍賣會學嘢
卓妮仲見到信和集團第三代黃永光（Daryl），佢謙稱係嚟學嘢，唔會舉手競投。卓妮問佢最欣賞邊位大師，佢又係林風眠嘅粉絲，盛讚林曾經放洋留學，所以畫風既有中國傳統文化，又有西方嘅味道，同香港一樣咁有中西合璧之美。
Daryl又趁機推介信和旗下推廣本地藝術嘅組織「Arts In Hong Kong」，話希望有朝一日，本地藝術可以喺好似蘇富比咁嘅平台受到國際關注。
卓妮