中環出更：莊家蕙賣古董搶年輕客
藝術可以陶冶性情，亦可令財富增長。喺美國讀藝術嘅莊士集團太子女莊家蕙（Candy），兩年前接阿爸手做富得拍賣行主席。不過要將藝術同財富貫通，Candy唔敢亂開空頭支票，但係對於今日開始，一連兩日嘅富得十周年慶典拍賣會，佢就好有信心可以交出成績。
拍賣會今日開始，但係預展星期日已經開始，身為統帥嘅Candy每日到場打點。對住大佢幾倍嘅藝術品，年紀輕輕嘅Candy一啲都唔覺得悶。不過幾有興趣都好，打唔響個算盤，都難以向阿爸交代！Candy揚一揚眉，笑笑口話︰「搵錢？我唔識架！慢慢學囉！不過我對自己有要求，有信心今次拍賣會交到功課。」Candy話公司有富經驗嘅團隊、好資深嘅收藏家同鑑賞家做後防，佢作為主席要做嘅係確保公司運作正常，同埋吸引多啲年輕人對拍賣古董嘅興趣，廣開客源。
富得十周年慶典
古董巿場有投資潛力，因此巿場上嘅拍賣大行亦唔少，只有十年歷史嘅富得，就好似Candy咁，夠年輕少包袱，除咗上千萬嘅貨物，十零廿萬嘅精品佢哋都有，總之以適合潮流同巿場為大原則。Candy深明貨品得唔得，客人反應係最直接指標，就以今次為例，唔少貨都已經有客講明鍾意，加上呢兩三年間，Candy睇住業績上升，向來少宣傳嘅富得，喺今次十周年慶典唔單止令人注意到佢嘅存在，仲吸引咗唔少新面孔嘅投資者、收藏家同對古董藝術有興趣嘅人嚟參觀，間接為Candy打咗一支強心針。
不過面對住咁多叻人前輩，Candy好明白「滿招損」，所以佢以做好本分為大前提，要對得住家族、父母同自己。卓妮見前排打波扭親腳仲未好嘅Candy，左腳腳踭戴住護踭，仲着住對三吋高踭鞋滿場飛，勤力唔使用口嚟證明。
卓妮