政情：金刀梁避敏感話題

為期三日嘅香港中學生模擬聯合國會議尋日正式開幕，舉行會議嘅地點正正係上個月政務司司長唐英年出席青年高峰會議時畀人掟鞋嘅柴灣青年廣場。主辦單位搵咗行會成員金刀梁梁智鴻演講，大家都好想知佢重踏唐唐當日肇事現場有乜感覺，但梁智鴻就只係輕輕帶過話：「有啲人有時係太過激烈嘅。」問佢覺唔覺得政府同青年人溝通不足呢？金刀梁今次索性打側身避咗去，只係話溝通永遠都唔會足夠，無正面回應。