政情：陳淑莊自稱被迫遷
自從建制派表明唔玩補選，發起辭職嘅公民黨同社民連惟有自己出力谷起補選氣氛，有份辭職嘅公民黨陳淑莊（Tanya）最近仲聲稱畀人「迫遷」。原來Tanya○七年選區議會之前，租咗灣仔李節花園一個單位，一住三年。Tanya話過去每年同業主續約都好順利，租約喺下個月十四日到期、即啱啱喺補選前兩日，點知上個月業主透過經紀話要收番層樓自住，要求佢準時喺十四日租約期滿前搬走。Tanya話知道後即刻打咗個突，希望業主通融一下，起碼等佢住到補選完先搬走，但業主方面企到硬，一日都唔肯遲。
Tanya話一直同業主關係唔錯，質疑唔知係咪因為對方係中資公司背景，唔鍾意佢辭職先唔租畀佢，不過既然有白紙黑字嘅合約，惟有急急搵地方搬。
翻查田土廳資料，Tanya嘅單位屬於中國太平洋保險（香港）所有，我哋問過業主，太平洋保險發言人回應話，單位要用嚟做員工宿舍，佢哋依足合約要求嘅程序去做，完全不涉政治。其實太平洋保險身為業主，確實有權收番層樓，更何況人哋都依足程序做，所以談唔談得上「迫遷」，大家心中有數。