政情：楊釗睇淡今年樓市

做牛仔褲發達嘅「神經富豪」楊釗，投資地產同樣出色，自八十年代起買賣尖沙咀、旺角等商廈，屢有豐厚回報，最新代表作係○八年沽售長沙灣貿易廣場全幢，持貨廿年獲利逾十億銀，仲有最近才出售嘅灣仔博滙大廈。現時名店林立嘅北京道一號，亦係佢旗下物業。楊釗善於喺高位沽貨圖利，被譽為地產奇才。

不過近年佢沽多買少，即使樓市熾熱，仍然忍手。早前我哋喺機場巧遇楊釗，佢解釋忍手有原因。楊釗話，今年無論內地政府及港府，都有決心出招整頓樓市，招數係乜，力度有幾大，仍然係未知之數，但佢預測整頓招數可能會有啲料到，否則搔不着癢處噃。為免買錯嘢，楊釗寧願按兵不動，今年唔會入貨住。