政情：消防答問會錄影嚇窒下屬

救火英雄楊俊傑喺長沙灣四級火中不幸殉職，好多消防手足都抱怨人手同消防設備唔夠，消防處處長盧振雄為表誠意，立即連開三場答問大會，希望聽吓同事訴求，點知班伙記尋日發現場內有部攝錄機影住自己，即刻收聲，驚第日畀部門秋後算帳！

繼上周三後，消防處由尋日起一連兩日喺尖沙咀消防局舉行三場答問大會，本來第一次答問會氣氛都唔錯，點知尋日第二場就出事，啲同事一入去，就發現有攝錄機對住自己。有消防員話，講嘢嗰陣都顯得好避忌，好多嘢都唔敢講，唔能夠暢所欲言，驚第日畀人秋後算帳，甚至影響升職。

消防處發言人就回應，由於大會可容納人數有限；如果坐滿咗，其他同事就要坐另外兩間房，錄影只係為咗即場轉播，錄影完之後就會刪除，絕對唔會留底，更加唔會攞嚟秋後算帳，叫班同事放心。不過，既然員工有咁嘅擔憂，唔知管方會唔會從善如流取消錄影呢？大不了搞多場，否則做三場諮詢又有啲咩作用？