政情：林鄭暗插煲呔曾分工唔勻

娥姐尋日上電台再為強拍條例解畫，但醉翁之意不在酒，實為抒發個人感受，力圖洗脫其深入民心嘅「好打得」形象。娥姐多番澄清自己唔係好打得，亦唔係好強硬嘅人，好似「獨斷獨行」、「剛愎自用」呢類形容詞同佢作風唔係好脗合。娥姐話：「其實我係好樂於妥協，亦希望將事件做好，所以好打得形象就似乎同事實唔係好接近囉！」

娥姐進一步指「好打得」呢個形容詞好影響市民觀感，導致先入為主認為某一官員純粹靠「好打得」來推動政策，一來唔係咁好，二來會令人覺得「好打得」等於好捱得、好做得，所以好多工作都係發展局一力承擔，可惜每個政策局人力資源有限，不能無止境加強下屬工作量。

歸咎工作崗位惹民憤

娥姐咁講，變相暗批煲呔曾分工不均，將所有惡啃工作推畀發展局一力承擔。記得早前《城市論壇》主持踢爆，話本來佢哋開壇講骨灰龕嘅事，係想搵食物及衞生局派員出席，點知食衞局推畀發展局，但發展局又推番畀下面嘅地政總署，地政總署又推番畀食衞局，最後無一個政府部門肯派員出席。呢件事睇得出娥姐對工作分配不均嘅不滿，相信呢啲只係冰山一角。不過，連問責局長都公開咁呻，煲呔曾實在係責無旁貸。

對於近期推銷強拍條例備受批評，連身為前高官嘅立法會議員都登報質疑佢偏幫商界，娥姐就歸咎同工作崗位有關，話當年佢做社會福利署署長時，推行一筆過撥款或綜援金改革都惹起爭議，到依家做發展局局長，因工作同土地及發展息息相關，好不幸市民對地產商嘅觀感反射喺官員身上，令佢好無奈；言下之意真係多得地產商唔少。

不過，娥姐雖然畀外界覺得「好打得」，喺政府內部卻未能盡得支持；即使佢成功搣甩「好打得」個外號，但唔改變做事強硬甚至霸道嘅作風，只會繼續惹火。