中環出更：孫國林撐四叔係好老闆
順德聯誼總會前晚喺會展搞咗個會員聯歡會，兼且慶祝成立六十三周年，身為首席榮譽會長嘅四叔李兆基無嚟撐場，唔知關唔關最近天匯事呢？恒基地產部執行董事孫國林就拍心口話絕無其事，因為四叔根本唔係咁嘅人。孫國林現身聯歡會，原來佢係四叔同鄉，大家都係順德人，佢喺恒基做咗十幾年，當年佢喺舊公司做咗成廿年，後來因為想轉環境，加上四叔好有誠意力邀佢過檔，所以就過咗去幫四叔手。
四叔對員工好係人都知，好似早幾年娶新抱，員工每人獲發一封萬蚊利是「齊歡暢」，○八年初四叔見兆基財經有滿意業績，加上嗰年抱孫兼攞埋大紫荊勳章，又私人醒伙記每人一萬蚊利是過年，去年年尾個巿有起色，佢又請同事去海南島旅行。
公司包伙食有下午茶
咁都唔止，孫國林話畀卓妮知，仲有一樣真係依家無幾多間公司做得到，就係包飯。佢話公司咁多年都係包員工伙食，上上下下一齊食晏，到三點三，又會有下午茶，雖然只係一個包、一件餅，但都睇得出四叔唔係孤寒財主。
同場仲有堪輿家蔡伯勵，原來佢都係順德人。問蔡師傅點睇今年嘅經濟狀況，佢就話今年個巿反覆，投資作決定要謹慎，總之最緊要穩陣，到二○一一年就會好好多喎。
卓妮