中環出更：肥亨拉隊「迎月」歎小菜
前商務及經濟發展局局長馬時亨一向識飲識食，住喺港島嘅佢，早前竟然貢咗去新蒲崗嘅「迎月小菜館」作家庭聚餐，咁啱畀卓妮撞到。呢區工廈林立，何解吸引到佢嚟幫襯？肥亨一句講晒：食嘢不分平貴，最緊要好味！
外甥輸波請食飯
卓妮早前路經新蒲崗執平貨，赫然發現景福街地下嘅小菜館內有肥亨身影。睇真啲，原來馬太王培琪（Linda）、大女馬露明、馬時亨妹妹Pauline、妹夫廖先生、外甥廖智亨及外甥女廖智盈喺齊度開餐。呢餐係智亨做東，佢自爆早前同舅父打高球輸咗波，雖然讀緊預科無收入，但新年<img src='/font/fb66_5nbk.gif' border='0'/>咗唔少利是，夠錢請客喎。
肥亨揀食肆一向有要求，早前聽金牌經理人黃栢高（Paco）大讚「迎月小菜館」菜式正，呢晚拉隊嚟試菜。一嚟就柯打必吃嘅四大名菜，就係「迎月小炒皇」、「煎焗魚嘴煲」、「秘製銅盆雞」及「避風塘雙霸」，齋聽餸名，就知夠晒大牌檔風味，瘦身成功嘅肥亨一於起筷夾多兩舊餸，果然鑊氣十足，食到肥亨眼仔碌碌，仲豎起手指話無揀錯到地方，佢尤其鍾意嗰味魚嘴煲。
馬太平日好少蒲新蒲崗，睇見大廚用心炒出風味小菜，亦讚不絕口。肥亨愈食愈滋味，加料點多幾味，包括「鮑汁鵝掌」、「麵醬唐生菜」、「燒汁雜菌炒牛柳粒」，仲有佢甚為欣賞嘅「啫啫鮑魚煲」，埋單計數，不過一千二百幾蚊，超抵食！肥亨話，食肆咁有香港風味，值得推介畀老友，唔通佢想做埋旅發局主席田北俊嗰份？
肥亨雖然離開咗官場，但人氣依然咁旺，小菜館店長華哥臨走捉住肥亨影合照，話要擺出門口做生招牌。肥亨聽見笑騎騎點頭，話晒依家無官一身輕，即使幫人做生招牌，都唔驚會惹來閒話喇！
卓妮