兩黑幫息干戈拍住搵快錢
有錢齊齊搵，平時打生打死的不同黑幫，在金錢利益掛帥下，也可化干戈為玉帛，攜手「搵快錢」，警方前晚截獲的「K仔快餐車」，便是箇中「典範」，有知情人士更一語道破：「銷售網絡大咗，錢搵多咗，點解唔拍住上？」
案中被捕兩名涉案男子，警方調查後揭發他們來自兩個不同堂口，雙方不時出現紛爭，江湖上兵戎相見，但今次卻化敵為友，不免令人嘖嘖稱奇。
加大銷售網增利潤
但據知情人士透露，其實「跨黨派合作」的販毒活動，近年並不罕見，所以由兩幫合營的「K仔快餐車」愈來愈多，因為市場大，各有客源，難以一幫獨大，壟斷整個市場，故此不少堂口為擴大生意，都會與其他堂口合作，加大銷售網絡增加利潤。
「好似一條街嘅夜場咁，呢間我睇場，嗰間由另一個堂口睇場，如果大家合作，兩個場都可以搵到錢，大家都有着數。」他說，在利益面前，沒有永遠的敵人，部分堂口最喜歡利用這種「合縱連橫」策略，與其他堂口結盟，抗衡其他對手，增加生存能力。 記者曾海帆