政情：老董被踢爆神秘訪台
近年兩岸三地關係大為改善，多名港府高官先後以不同身份破冰訪台。台灣當地傳媒尋日就踢爆，身為全國政協副主席嘅「老董」董建華同太太董趙洪娉，尋日朝早秘密乘坐港龍航空由香港飛抵高雄，展開為期六日嘅神秘訪台行程。
報道話老董此行屬私人性質，具體行程由佢喺台灣嘅妹夫、中國航運公司董事長彭蔭剛安排，仲話首站拜會咗佢喺高雄嘅洪姓親家，又去咗佢家族企業東方海外航運喺當地承租嘅一個碼頭視察，跟住會喺台南留兩日，再上番台北。報道稱整個行程未有安排與台灣政府官員會面，只會同國民黨榮譽主席連戰食餐飯，抵台嘅時候又冇用特別通道或受到額外禮遇。
老董尋日抵埗時喺高雄小港機場被傳媒「撞破」，記者問佢今次訪問嘅詳情，老董只係答咗一句：「私人訪問，不要驚動大家。」訪台之行被踢爆後，老董傍晚惟有發表聲明，自言十幾年冇去過台灣，此行主要係探望喺高雄嘅親家同喺台北定居嘅妹妹同妹夫。