政情：鬧港英CY遲來的勇氣
明愛家庭服務中心尋日請咗行會召集人梁振英（CY）同一班中產人士分享快樂之道，點知CY一再離題，由六、七十年代嘅香港講到近期嘅最低工資爭議，連司儀都忍唔住問佢：如果佢做到特首，會點處理呢啲問題？CY今次無迴避，仲話會重新向大家解釋功能組別嘅真正意義，更暗寸為最低工資成眾矢之的嘅張宇人，話功能組別選出嚟嘅議員唔係只代表佢哋業界利益。
司儀之後再問CY：如果畀佢揀「放下」一啲嘢，佢會放棄啲咩呢？CY再次扯到無雷公咁遠，批評港英政府無喺香港回歸前制訂長遠政策，喺醫療融資、退休保障及空氣污染等議題上交白卷，令香港發展停滯不前。佢又暗寸煲呔曾政府，話社會上無一個議題係無爭議性，「一提出嚟實畀人鬧」，但政府唔應該因此縮沙，應該有美國總統奧巴馬推行醫改時嘅勇氣，否則香港過後嘅幾代人仍然會面對一樣嘅問題喎。用佢嘅話說：依家係時候為香港P:制訂一啲長遠啲嘅政策。
呢排見CY都聽佢講遠景，其實佢早於香港後過渡期已參與討論香港事務，回歸後做咗行會成員，一做十三年，佢依家先至嚟講長遠規劃，若非為特首選舉，就係遲來的勇氣、遲來的反省！