政情：林鄭張震遠唱雙簧解畫

節目一開始已經畀娥姐笠高帽話「佢打得過我」嘅張震遠，先講永利街有六成業主唔肯賣，甚至要自己維修保育，所以市建局先至提出新方案。佢一再強調唔係乘機壓價或者逼業主快啲賣：「我哋唔係好蠢，但亦無咁聰明……我哋比較唔係咁蠱惑，諗到咁多嘅計！」

「無咁聰明、無咁蠱惑」

話口未完，娥姐即刻幫口話，原本嘅保育方案得到正面評價，係城規會啟動諮詢程序再加埋《歲月神偷》，先令到反對聲音增加，仲話新方案可避免不必要爭論喎。娥姐仲張震遠上身咁話，政府「無咁聰明、無咁蠱惑，亦無咁嘅需要」……一切純屬巧合。仲話佢哋係「老實嘅公職人員，無呢個政治敏感度」，如果一早諗到會令人有聯想，就應該避一避喎。兩人嘅口脗，幾乎一樣。

張震遠見娥姐講到咁開心，又加把口，話呢個原汁原味保育方案醞釀多時，同○八年底董事會嘅決定原則上無改變喎，又賴早排大家忙住搞馬頭圍道項目，市建局先無再開董事會通過新保育方案喎。

不過，一切巧合得令人不得不提出質疑，事關新保育方案唔遲又唔早，啱啱喺立法會表決降低強拍門檻前一日宣布，又唔等巿建局董事會再開會表決就拿拿臨啟動，難怪有市建局董事質疑，市建局同政府扯貓尾，甚至係被迫為娥姐強推「不撤回、不修訂、不重提」嘅強拍門檻修訂條例降溫。

娥姐同張震遠尋日再出嚟唱雙簧，新意欠奉，但《政府新聞網》卻不厭其煩，將兩人喺電台上嘅解畫放上網，最後一句特別強調兩位都話永利街保育方案同修訂強拍門檻無任何關係，真係有啲此地無銀三百両！