中環出更：金刀梁愛之夜千人瘋狂扮嘢
名人形象百變，衣着配搭往往成為金漆標記。為慈善，行會成員梁智鴻（金刀梁）連自己都擺上枱。無他，由梁醫生擔任主席嘅「中國愛滋病防治行動香港委員會」前晚（廿六日）舉行籌款之夜，為搞氣氛，來賓一律奉旨扮嘢，「眾人媽打」李麗娟扮《季節》中嘅「媽打」鄧碧雲，莎莎國際主席郭少明一家扮齊機長、船長同空姐，九巴董事雷禮權（William）就扮中間分界嘅梁智鴻，最激係太太利蘊珍，全身塗上藍色顏料，扮阿凡達，激爆全場！
晚宴開宗明義係「瘋狂扮嘢愛之夜」，近千位嘉賓攞正牌扮嘢，大會設多個「扮嘢」比賽，目標對準金刀梁，搞咗個「瘋狂智扮金刀梁比賽」，William雷有備而來，用髮蠟將頭髮梳成中間分界，戴埋黑粗框眼鏡，誓要博金刀梁一笑。
扮金刀梁原來有竅門，有份做評判嘅金刀梁太太大爆老公秘密，原來佢老公幾十年來都係搽一種產自德國嘅髮蠟「TABAC」，呢支膏已好難買到，梁醫生託相熟藥房至訂到，尋日買咗幾支任嘉賓試用，最難得係連支珍藏嘅1982 Chateau Lafite-Rothschild 都攞埋出嚟拍賣籌款。
媽打扮媽打
玩具大王蔡志明太太李惠莉都嚟玩埋一份，佢笑言扮得誇張唔啱佢，所以繼續扮靚靚，手挽新款閃令令Chanel手袋，加埋鑽石伯爵錶，搶晒鏡！千金蔡加怡就扮調皮可人嘅Dancing Queen，攞咗個購自連卡佛嘅紅唇手袋，輕易成為焦點。
身為籌委會副主席嘅李麗娟呢次真係變身做「媽打」鄧碧雲，喺電視台借來當年鄧碧雲拍劇時專用嘅假髮及黑框眼鏡，再配上一件「中藝」唐裝，誠意十足。
卓妮