中環出更：名人出錢出力植樹撐男拔
拔萃男書院一向都係政商界名人嘅盛產地，唔少望子成龍嘅家長爭崩頭都要保送囝囝入去。尋日男拔就搞咗個植樹日，邀請師生校友同家長齊齊參與，為學校嚟緊一年搞嘅環保活動籌集經費。本身係女拔舊生、兩個囡囡都喺女拔就讀嘅房屋及運輸局局長鄭汝樺仲一早現身，親自種植一棵以佢名字命名嘅樹，理文造紙嘅李文俊同太子珠寶嘅鄧鉅明更出錢出力，撐讀緊男拔嘅囝囝。
卓妮一去到，就見到被外界冠以「張廿蚊」嘅自由黨立法會議員張宇人畀班校園小記者圍住，莫非連小學生都想追殺佢最低工資單嘢？張廿蚊就話，班小學生只係問佢環保嘢啫。對於自由黨精神領袖田北俊對佢早前嘅道歉唔多收貨，佢就話以後唔再評論呢件事，要講都只會講業界嘅研究報告喎。
學生為「廿蚊Cheung」感羞恥
本身為男拔校董嘅張宇人今勻得罪晒全世界，唔少男拔生都喺facebook加入群組，話以身為校董嘅張宇人感到羞恥。校長張灼祥就話呢件係好事，事關男拔仔一向敢言，但勸大家討論態度溫和啲好。閒聊間，張校長仲叫張宇人做「廿蚊Cheung」，睇嚟呢個名已深入民心。
理文造紙首席執行官李文俊尋日都攜同腹大便便嘅太太一齊出席，原來佢個大仔喺男拔讀緊書，好想細仔兩年後入埋去。問李文俊今次捐咗幾多錢畀男拔，佢就話：「唔清楚，十萬啩，要問番太太先知。」點知李太搶答話冇咁多喎，事關佢家用都冇咁多，都唔知信邊個好！
太子珠寶老闆鄧鉅明夫婦都有嚟，佢六歲嘅囝囝Eric同李文俊嘅大仔係同學，都讀男拔小學一年級。鄧鉅明大讚男拔係間好好學校，但慨嘆好難入，好彩囝囝入到。據聞男拔咁樣閒閒哋搵家長種幾十棵盆栽，已為學校籌得七十幾萬善款，佢哋嘅校友家長果然彈藥十足。
卓妮