政情：李本瀅慨嘆台長唔易做

咪以為廿蚊一個鐘嘅工難打，做天文台台長呢個「風水位」一樣唔易撈，事關天有不測之風雲，有時準得滯，一樣「濕滯」。天文台台長李本瀅舊年五月先接棒做台長，但已經體驗到壓力。好似預測紫外線咁，有時太陽伯伯開行火力，紫外線自然就強勁啲，咁自不然個預測指數就高啲，不過居然就有人開聲話佢咁講會影響香港旅遊業。講得影響旅遊業，大家好自然就聯想到三個名字︰旅遊界立法會代表謝偉俊、旅遊業議會主席胡兆英同田北俊，係邊個呢？李台長點都唔肯講，不過斷估都唔會係應屆香港小姐旅遊大使黃嘉麗啩！

講開好工，現役天文台科學主任以上嘅職位陸續步入退休期，所以嚟緊都會進行招聘，雖然份工壓力唔小，但同廿蚊工相比，點都叫做薪高糧準，所以李本瀅話唔怕會青黃不接喎。