政情：謝偉俊胡兆英同場駁火
早前有菲律賓旅行團來港畀人「賣豬仔」，當時旅遊界立法會議員謝偉俊（Paul）搶先安排班旅客入住酒店，之後同傳媒力數經濟動力成員胡兆英揸旗嘅旅遊業議會不是，話佢哋喺緊急時刻潛咗水，而胡兆英亦公開質疑阿Paul講大話。事隔兩星期，雙方仲未下火，碰頭時火藥味仍然十足！
傳爭下屆立會議席
話說尋日深圳機場喺香港新開設嘅城市候機樓開張，胡兆英同阿Paul呢兩個旅遊界重要人物冤家路窄。有傳胡兆英覬覦阿Paul嘅議席，佢尋日就唔肯正面回應係咪會參選，但就批評阿Paul做得未夠好，話希望佢作為議員「睇嘢睇廣啲」喎，仲話「冇人可以做晒所有層面嘅工作，如果跟住分工做，大家合作會更愉快囉！」擺到明寸阿Paul搶嘢做。
對於胡兆英隨時狙擊佢，阿Paul反而不以為然，仲話依家決定角唔角逐下屆旅遊界議席仲係言之尚早，唔排除下屆會參與直選。如果阿Paul去直選，大家就唔使鬥喇。