口口聲聲話最低工資廿蚊就夠嘅張廿蚊張宇人，發表廿蚊論後，唔止畀人兜口兜面掟銀紙，仲畀其他立法會議員不留情面發炮暗寸。工聯會王國興率先喺人力事務委員會暗窒張廿蚊，話最少要三十四蚊先有人味、有人性，仲拎埋天水圍茶餐廳嘅外賣紙出嚟，話天水圍一碗魚蛋麵都要廿蚊，按「某人」講法只食到碗麵，提議「某人」試吓廿蚊一個鐘嘅工。另一工聯會議員葉偉明都話廿蚊無乜人可接受，一個月五千蚊都唔夠好有問題；睇怕張廿蚊有排煩。