政情：蔡志明愛彼錶識音樂報時
匯聚全港「家己冷」精英嘅「香港潮屬社團總會」，尋日舉行新一屆會董就職禮，潮州商會會長許學之升呢做潮籍社團總會主席，近八百位「家己冷」尋日齊集會展慶祝，唔少潮籍富商現身撐場，包括長實主席李嘉誠表弟莊學山、全國僑聯副主席陳有慶、「深圳王」黃楚標及全國政協常委戴德豐，仲有立法會議員林大輝。
許學之抱恙就職主席
晚宴以玩具大王蔡志明最搶鏡，佢手上戴住價值超過四百萬元嘅鑽石愛彼錶（Audemars Piguet）亮相，隻錶全港獨一無二。蔡老闆透露鍾情收藏世界十大名錶，珍藏品多達一百隻，稱得上係「名錶大王」。
許主席致歡迎辭時聲如洪鐘，但原來佢抱恙在身，前晚突然感到腸胃不適，朝早起身時個頭仍然赤赤痛。佢苦笑話，差啲出席唔到就職禮，好彩睇咗西醫之後就無事。
就職禮上，蔡志明及高佩璇獲潮屬社團總會增聘為名譽會長，蔡老闆西裝筆挺上台，不經意露出閃爍生輝嘅愛彼錶。原來隻錶八個月前新鮮熱辣到港，蔡生一望就鍾意，事關隻錶具備罕有嘅音樂報時功能，只要按一按錶上一粒掣，隻錶就會發出柔揚悅耳音樂，貴一貴都係值得！