政情：立會參觀世博爆口水戰

議員其中一個爭議點係幾時成行，率先發言嘅民主黨劉慧卿重申要等補選結束，六十個議員齊齊整整先出發。不過大部分建制派議員一致話要五月第一或第二個星期去世博，搞到卿姐鬼咁冇癮。

不過，建制派對出發日期都有分歧，自由黨方剛直言開幕日主人家要接待外國元首，香港議員根本未夠級數出席；專業會議梁美芬都覺得議員唔應該咁霸道話一定要去睇開幕，但佢話真係好想睇開幕喎。工聯會黃國健就話世博開幕日係五一勞動節，撞正勞工界大日子，工聯會有好多活動要搞，所以希望行程就一就。

議員拗完日期傾行程，仲要拗到同黨同派都一樣冇面畀。好似民建聯陳鑑林建議參觀世博時順道訪問內地金融事務辦公室，點知該黨主席譚耀宗毫不客氣反對：「唔可能啦！無時間，我哋唔可以咁貪心。」梁美芬就興高采烈話贊成旅遊界謝偉俊建議，唔搭直航機改乘高鐵去上海，最好請埋高鐵專家沿途講解，但其專業會議盟友劉秀成就話高鐵幾時都可以搭，此行唔想搭高鐵喎。眾人七嘴八舌拗一餐，最終都無共識。

主辦單位原來未發邀請

班立法會議員由事務委員會一路拗到內會，因為當初話搞世博團只係立法會主席同中聯辦人士非正式會面時「閒聊」傾出嚟，時至今日主辦單位都未曾向立法會發出邀請。難怪卿姐揶揄話：「成件事係主席搞出嚟，原來冇人邀請我哋！」立法會工業界代表林大輝都話要搞清楚依家係被邀請定係立法會自行組團上去，佢話如果係前者，根本無必要傾咁多，因為客隨主便，一切應配合主人家嘅安排。內會主席劉健儀（Miriam）聽到同事咁講都好無奈，佢笑言：「依家係邀請緊人哋來邀請我哋……有眉目㗎嘞！」大家你有你講，我有我講，沒完沒了……