中環耳目：「水餃王后」被素餃考起
「水餃王后」臧姑娘「點餃成金」，撚手水餃由灣仔碼頭賣到全中國，演繹香港版「阿信的故事」。臧姑娘乜水餃都識整，偏偏有一種水餃至今仍然唔賣出市場，就係素水餃嘞。臧姑娘話，素水餃蛋白成分要夠高，要加入豆腐先好味，偏偏呢種材料易變酸，唔容易保存，為免影響金漆招牌，寧願唔出品住喎。
拚搏多年嘅臧姑娘，近年受心臟毛病困擾，飲食相當清淡，唔出外應酬嘅日子，會以清水撈白飯，等腸胃休息吓；早前佢出席酒會時，見佢精神奕奕。食得咁清，咁何不出品埋素水餃，益人又益己呢？臧姑娘果然係專家，佢娓娓道來，話做素水餃話都冇咁易，不過豆腐呢種材料處理時好考功夫，放得耐容易發酸味；此外，素餃一般要上乘蔬菜材料，否則淡而無味，成本分分鐘貴過肉餃，諗來諗去仍未度出最佳配方，所以寧願唔出住嘞。
「灣仔碼頭」呢個香港品牌早已打開內地市場，臧姑娘早前斥資喺北京買咗塊五百畝嘅土地，發展為旗艦生產基地，向神州全面進發！