中環出更（二）：何超鳳高佩璇熱捧Loewe
西班牙皮革品牌Loewe向來不乏靚太追捧，其中喺1975年推出嘅Amazona手袋，咁多年嚟都得到名媛寵愛。向來低調嘅賭王二房千金何超鳳，早前卓妮見佢喺中環太子大廈等車，手上攞住嘅就係08年嘅黑色猄皮款Amazona，當時賣$13,500。早排香港潮屬社團總會名譽主席高佩璇出席南蓮園池嘅傳統竹藤藝術活動，特登攞咗個年前出產大約萬五、六蚊嘅白色編織Amazona出席，襯番個主題。
Amazona喺西班牙嘅法國時代結束之後推出，標誌着更大嘅自由同更寫意嘅態度，亦令人聯想係為能夠享有更大權力、更獨立自主嘅女性而創製，所以都好適合何超鳳同高佩璇呢兩位實幹派女強人。Loewe視Amazona為Signature bag，呢個用六十一塊皮革製造嘅手袋，每一塊皮都要係最完美先會用。由準備、裁剪、縫紉到裝合仲要搵四位專門工藝師做，每個要六個半小時製作先起到貨，都咪話唔巴閉！
卓妮