中環出更（一）：葉澍堃召新知舊雨食盆菜夠熱鬧
前經濟發展及勞工局局長葉澍堃（Stephen）一向交遊廣闊，○七年離開官場後更變身「新廚神」，寫食經推介美食之餘，仲頻頻同好友捐窿捐罅搵好嘢食。好似啱啱過去嘅星期日（廿一日），Stephen召集去屏山鄧氏宗祠食風味盆菜宴，多位當年做過佢下屬嘅現任高官唔嫌遠貢去元朗，新知舊雨聚首，夠晒熱鬧！
鄧慶治做東宴客
屏山盆菜做到街知巷聞，已成為景點；但原來好多高官都未有機會試。身為地頭蟲嘅著名時裝設計師鄧達智阿叔鄧慶治，當日就喺祠堂筵開廿八圍宴客，請各界好友品嘗盆菜，Stephen夫婦都係座上客。
Stephen愛熱鬧，Call齊官場老友坐滿一圍，包括新聞處處長黃偉綸夫婦、康文署署長馮程淑儀（Betty）夫婦、民政事務局副秘書長雷潔玉、甄美薇等及立法會議員石禮謙等。Betty馮開餐不忘家人，帶埋任職生產力促進局行政總裁嘅老公馮永業及女兒同來，十足家庭日。原來馮Sir同Stephen淵源深，○五年Stephen做經濟發展及勞工局局長時，馮Sir係佢副常秘，即係舊下屬；而黃偉綸都做過Stephen嘅副常秘，難得有機會聚首一堂歎食盆菜。
有好嘢食，Stephen踩入炮製盆菜嘅廚房作現場直擊，睇見灶頭上擺滿一字排開嘅黃酒雞，佢馬上攞部相機出嚟係咁影。盆菜上枱時，仲有幾碟屏山撚手小菜跟尾，包括梅子豬手、炆冬菇、酥炸門鱔、黃酒雞及神仙鴨等，睇見都流晒口水。
鏞記老闆甘健成都拉埋媽媽及兩位公子嚟開餐，原來甘老闆同鄧慶治老友鬼鬼，一於攞出私伙十八年陳皮，炮製招牌「陳皮燉鴨湯」。上等陳皮每斤閒閒哋過萬銀，甘老闆佢話最緊要大家食得開心。
卓妮喺祠堂內四圍敬酒，撞到莎莎國際主席郭少明夫婦同前民政事務局局長李麗娟。原來郭生郭太同Stephen好老友，大家喺馬場跑完馬，就趕到屏山，仲叫埋一圍老友嚟，實行與眾同樂！
卓妮