中環長命斜超跣隨時車禍

從事運輸業的譚先生不時駛經奧卑利街，早已發現路面不但陡斜，且還過分「光滑」，「有次我踩住煞車掣，架車都係咁衝落去，真係分分鐘跣死！」譚於去年八月曾向政府熱線1823反映，未料路政署職員的回覆竟令譚更為光火，「佢話已經知道咗好耐，仲話會喺舊年年底整，點知到依家都未整！」譚不滿該署錯而不改，經再三追問對方仍以難以封路作迴避，「咁即係一世封唔到路就一世唔使整？」

斜道逾11度極為危險

為了解奧卑利街長命斜之險，記者特別帶同斜度儀作實地量度，一度之下，發現斜度竟逾十一度（即1：5），但除荷李活道與士丹頓街一小段路面鋪有防滑鋼沙外，其餘路面均為光滑水泥路。在私家車、專線小巴與重型貨車不斷駛經期間，因煞車而發出的「吱吱」聲不絕於耳。按屋宇署《設計手冊：暢通無阻的通道2008》所列，斜道理想坡道應介乎1：20至1：15（即二點九度至三點八度）之間，凡坡道大於1：10（五點七度）即表示存在危險。

「成半年都冇做嘢，唔係又要等到有事先嚟補鑊啩？」中西區區議員陳淑莊不滿路政署跟進「歎慢板」，令駕駛者未獲保障。陳指奧卑利街不設警告交通標誌，加上路面光滑，天雨期間更易釀成意外，促路政署盡早加設防滑設備及警告告示，防患於未然。

奧卑利街地勢陡斜，屬中區繁忙道路之一。	關先生：「呢條路真係又斜又跣，我見過有部的士踩住煞車掣都係咁碌落去，真係好危險！」	何先生：「我唔係成日嚟呢度，但次次嚟都覺得好跣，附近又冇警告牌，真係幾驚㗎！」

促鋪設鋼沙加設警告

「依家啲車路最斜都係1:10，成1:5真係好斜，加埋條路跣就會好危險！」香港專業教育學院（青衣）建造工程系首席講師黃漢平認為，須為整條奧卑利街加設防滑鋼沙才能解決過陡問題，同時亦建議在道路兩旁增加「道路陡斜、小心駕駛、請用低波」等警告告示。

路政署發言人承認，正着手籌劃全面為奧卑利街鋪設防滑鋼沙，惟因地理所限，難以在施工期間維持正常交通，加上臨時封閉上址作施工，會對附近商戶造成不便，現正與運輸署和警務處等相關部門詳細探討，找尋最佳方案，希望有關工程於今年內完成。另外，該署將建議運輸署在上址加設適當警告道路標示。