有電台搞咗個活動，其中一個目的係講吓濫藥嘅禍害，點知道社民連主席陶君行（圖）上台分享時，竟然當住八百名中小學生話：「奧巴馬同克林頓等美國總統細個都試過食可卡因，不過試吓就好喇，『可一不可再』嘛！」簡直教壞細路！
阿陶口出狂言後，台下嘅師生家長即刻滴晒汗，同場嘅正生書院校長陳兆焯亦忍唔住大叫：「一次都唔好啦！」有同為頒獎嘉賓嘅立法會議員上台時，都寸爆阿陶，「好似校園暴力咁，唔通我打完你之後，又話我只係試吓咩！」工聯會議員王國興亦都加入圍剿行列，強調一定係「不可一不可再」，仲抽晒水咁話自己一定會跟進財政預算案提到嗰三十億禁毒基金添。
事後有人幫阿陶解圍，話佢只係想講，錯咗一次都仲有翻身嘅機會啫。喺就快補選呢啲咁敏感嘅時刻，阿陶仲講埋啲咁嘅嘢，如果佢打算將「可一不可再」納入政綱嘅話，相信一定嚇死家長，要佢哋投票畀社民連就真係難上加難嘞！
