政情：郭少明貪靚巡舖減肥
莎莎國際主席郭少明向來都西裝筆挺示人，但原來佢呢個咁fit嘅身形背後都有段古。尋日我哋喺馬場撞到fit爆嘅郭主席時，佢就自爆依家呢個身形得來不易，仲話自己兩年前曾經一度「暴脹」，由本身着開四十八號西裝撐到五十二都嫌窄添，認真誇張。有次喺歐洲買西裝時，佢望住鏡入面嘅自己，終於覺得唔可以再肥落去，先的起心肝展開佢嘅減肥大計。
郭主席話佢自己巡舖當運動，一直並冇刻意做咩帶氧運動去減肥喎，但就餐餐只食六成飽，更由以前無甜不歡變到依家零甜品添，日積月累，兩年間減咗十幾磅，西裝更連四十六號都着得落，fit過未發福嗰陣。
郭主席坦言，嗰段「減肥生涯」真係好難捱，成日心思思想食嘢，但依家keep番身形後，覺得個人健康咗、舒服咗，唔單止已經掉晒屋企嗰啲令人眼冤嘅加大碼衫褲，仲自爆作為一個極度貪靚鬼，家吓買衫時選擇多咗，個人都開心咗好多喎。