政情：蔡志明會展設宴慰勞員工
玩具大王蔡志明出名錫員工，試過請高層員工遊美國作獎勵，前日蔡老闆喺會展筵開近百圍，答謝員工同客戶。主人家送出ＬＣＤ大電視、iPhone等豐富獎品抽獎，皆大歡喜。
旭日集團前晚搞周年聚餐，逾千賓客捧場。大老闆蔡志明與家人總動員扮靚靚出席，蔡太搵師傅訂造鑲滿水晶嘅紅色晚裝，大女加敏抱住千金靄翹，與夫婿馬鴻銘合組溫馨三人組，加敏仲預告有「造人」計劃，希望今年再添丁喎，細女加怡就穿上桃紅色斜膊晚裝，美艷動人。伊人身邊一直未有真命天子出現，佢就話唔急得喎，好彩細佬加讚高大有型，不時傍住家姐出入，做其護花使者。
抽獎表演 搞熱氣氛
講番個晚宴，蔡太話自七十年代起，每年都有聚餐，估唔到老公生意愈做愈大，圍數亦愈開愈多，呢晚莎莎國際主席郭少明伉儷、全國政協委員蔣麗芸及老公梁海明、港區人大代表王敏剛伉儷都係座上客。
為搞氣氛，蔡生自掏腰包送出多份禮物搞抽獎，又鼓勵員工參加天才表演，扮得似模似樣者重重有賞。咁體貼嘅老闆，恨死隔籬囉。