政情：吳文華立會座駕公有化

立法會旗下有三部車，車牌「LC1」係主席座駕，上星期啱啱換咗新車。「LC3」就係七人車，主要負責接送立法會秘書處職員出去開會或者搞活動時用，而「LC2」就係立法會秘書長嘅用車，依家用緊嘅係萬事得房車。Pauline前排決定「犧牲小我」，建議行管會換車時將「LC2」由房車轉做八人車，佢話見依家立法會好多職員都要出去做嘢，得「LC3」一部車接送實在唔夠用，如果佢部車轉咗八人車，就算多啲職員要出去做嘢，大家出入都方便啲。

「LC1」變跑房車惹質疑

被Pauline睇中嘅豐田ALPHARD混合動力環保車要成四十幾萬蚊，最多可以坐八個人，絕對方便立法會職員外勤訪問，反而如果得Pauline自己一個人坐，就好似唔係太符合秘書長嘅身份嘞。不過係人都知Pauline係工作狂，佢成日都係埋頭喺立法會做嘢，就算食飯時間都係步行去立法會附近食晏或者買飯盒，佢部車絕對係「開工不足」，所以今次嘅決定都算十分明智，唯一嘅缺點，就係犧牲咗秘書長嘅派頭囉。

今次立法會嘅換車行動，選車方面好似都好「獨特」，似乎無人願意安分守己，乖乖地去換番部正正經經同見得人嘅房車。就以立法會主席為例，佢嘅座駕「LC1」以前係部寶馬房車，依家就換咗部凌志GS450h油電燃跑房車。有議員對行委會呢個選擇感到好奇怪，事關跑車梗係買嚟畀自己揸㗎啦，點會買部車返嚟提升司機嘅駕駛享受？唔通有人技癢，得閒無事同司機爭部車嚟揸過吓癮？