中環耳目：高永文歎潮菜首推澄海老四
骨科醫生高永文唔止醫術精湛，仲好識飲識食，身為潮州人嘅佢，近年喺大學開班講潮州飲食文化，講到最愛潮菜，首推位於九龍城嘅「澄海老四」，一味鮮茨實炆排骨，有蔬菜又有肉，充分體現潮州人喜歡「素菜葷食」嘅飲食文化喎。
食潮菜大嘅高醫生，幫襯咗「澄海老四」十幾年。一般人只知潮州滷水食品最聞名，原來煮鮮茨實炆排骨更考功夫，鮮茨實喺香港非常罕見，想食就要喺家鄉潮州運嚟香港。以鮮茨實加上排骨一齊炆，味道清甜，排骨肉質又腍又滑，送飯最啱。
不過，高醫生近年頻頻去四川救災，幫助災民做復康治療，食川菜多過潮菜，最難忘係月前去四川廣漢市品嘗回鍋肉，據講呢度係回鍋肉嘅發源地，煮法最正宗。食回鍋肉趣事多，高醫生話，起初聽見唔少客人柯打一片回鍋肉，以為對方慳住荷包，一望之下，每片回鍋肉有成塊豬扒咁厚，肉質肥美，歎一舊，足夠飽成日。
卓妮