中環出更：鄭志明自認阿仙奴頭號fans
新創建尋日搞咗個一年一度嘅員工同樂日，董事總經理鄭家純三子鄭志明都有出席，與眾同樂。平日比較少公開露面嘅鄭志明話，佢一個月裏面，差唔多有一半時間留喺內地處理家族生意，但返香港就一定會約班朋友踢足球同睇波，仲爆自己以前好鍾意玩「閃避球」添，認真估佢唔到嘞。
波友趨之若鶩嘅英超正進行得如火如荼，鄭志明就話自己係英超勁旅阿仙奴嘅頭號粉絲，但要睇情況先知可唔可以飛去英國觀戰捧場，但就話可以嘅話就一定去。
鄭志明年紀輕輕已經幫手打理家族喺內地唔少嘅業務，當中包括污水處理項目。
搞環保提升集團形象
被問及會唔會覺得呢類工作有啲厭惡性，鄭志明好得體咁話，為咗家族生意，佢一定會全力以赴，仲話相信做多啲呢類環保工業，對集團嘅形象有幫助喎。
鄭志明大哥鄭志剛早已拉埋天窗，咁幾時又到佢呢？一聽到卓妮咁問，鄭志明即刻面都紅晒咁話，依家仲未有女友，呢啲嘢都係遲啲先講喎！
卓妮