中環出更：「好先生」史立德四卡鑽戒示愛
點至算係好老公？香港女士有好多標準。前仁愛堂主席史立德就以四卡鑽戒示愛，慶祝同太太史顏景蓮同度第三十個浪漫情人節，堪稱好先生。咁啱得咁蹺，史主席愛駒「好先生」尋日出戰沙田馬場奪冠。好先生史立德拉住「好先生」影頭馬相，果然人馬合一，夾到痹。
沙田馬場尋日舉行仁愛堂盃，仁愛堂主席卓歐靜美聯同一班總理入場，卓妮都貢去湊熱鬧，見到史家相當齊人，史太與仔女都入場為愛駒打氣。史太手挽淺啡色Hermes手袋，貴氣十足，右手巨型鑽戒睇落至少有四卡。史主席話，隻戒指購自新世界彤叔嘅名店「周大福」，金額唔方便講嘞，至少過百萬銀。咁捨得，原來太太陪伴佢走過三十載情人節，專登趁今年初一情人節表達心意。
史立德以行動做好先生榜樣，愛駒「好先生」尋日發力衝刺贏頭馬，奪得逾一百三十萬銀獎金，帶挈史太買多粒巨鑽都未定。
王英偉催谷囝囝新碟
卓妮轉頭又撞到全國人大代表王英偉（Wilfred）同太太簡美蓮，兩人拎住幾隻CD，睇清楚至知係囝囝王梓軒嘅新碟。Wilfred嘅朋友紛紛問佢攞隻碟嚟聽吓，王英偉樂得幫囝囝做吓宣傳，順便又聽吓意見。
立法會議員謝偉俊（Paul）尋日應仁愛堂總理郭鄭淑文邀請入場，太太白韻琴夫唱婦隨，白姐姐依家等緊黃毓民去報名參加立法會補選，總之準備好晒去追打佢。
卓歐靜美主席亦玩得投入，大會設立扮靚專櫃，請嚟化妝師為嘉賓畫花花，卓太慷慨借出粉面任畫唔嬲，結果面珠上多咗朵花，認真鬼馬。
卓妮