肌萎小兄弟 誓創理想城市

黃氏兩兄弟分別十五歲及十二歲，九八至九九年相繼確診患上肌肉萎縮症，醫生推斷兩人十四歲時需坐輪椅，心肺功能亦逐漸減退。媽媽黃夏佩蘭傷心隱瞞兒子的病情兩年：「消化咗就冇事喇，我都有同佢哋講，佢哋可能只得廿年命，佢哋就會問我『媽咪媽咪！帶我去睇多啲醫生啦！』有時我都好無奈。」

「唔等得喇！今日就要開工」

兄弟與父母齊心樂觀面對病情，哥哥Sam志願當城市規劃師，堅持每天畫一幅設計圖苦練。他昨日展示其中一幅「工程設計圖」，要在寓所外崎嶇長梯附近加建一條禁煙的行人天橋通往鐵路站：「我同細佬平時行樓梯要廿分鐘，有咗呢條橋，市民可以五分鐘即達鐵路站。」至於何時施工，Sam說：「唔等得喇！今日就要開工！」

養和醫院「山村義工隊」昨舉行第二屆「健步樂行獻愛心」籌款，預計可籌得三十萬元捐助予願望成真基金，當中包括幫助Sam的弟弟Jacky到日本接觸子彈火車。基金發言人指，每年平均可幫助一百個個案實現願望，去年亦有為「巴士迷」的Sam安排舉家到英國巴士廠大開眼界。