政情：陳有慶撐泰國安全
泰國局勢未明朗，紅衫軍用示威者鮮血潑向總理府，搞到好激！正當好多香港人暫時唔敢去曼谷旅行之際，呢幾日香港嚟咗一位泰國財金界猛人，就係前港區全國人大陳有慶嘅親弟、泰國盤谷銀行揸弗人陳有漢。莫非泰國真係亂成咁，連陳有漢都要嚟香港避靜？
陳有慶同陳有漢係華人巨富陳弼臣兒子，兩兄弟長期分隔香港與泰國兩地，難得弟弟來港，陳有慶夫婦尋日陪陳有漢去中環香港會食飯。講起泰國局勢，「泰國通」陳有慶氣定神閒話，泰國成日有人上街表達意見㗎啦，根本唔係問題，睇泰國股市尋日下晝仲升緊就知啦，弟弟最近嚟香港度假一周，共享天倫啫。佢仲話，大家唔使太緊張，依家去曼谷旅行仍然好安全，只要唔去示威地區就無問題！