政情：尹德勝鬧爆煲呔曾Rita劉

中華廠商聯合會前會長尹德勝尋日同傳媒講開以前做會長時同政府官員交手嘅勞氣事，由煲呔曾一路數到商務及經濟發展局局長劉吳惠蘭（Rita）。尹德勝話，上一任特首時不時會主動約晤四大商會交流，但煲呔曾上台就好少咁做。至於Rita作為政府與商會嘅對口單位負責人就更加難接觸到，佢話當年想約新上任局長嘅Rita食飯交流，點知對方話唔得閒拒絕應約，約咗幾次終於就到時間，但Rita就好公式化咁叫人問定會傾乜議題，好古怪。

不過廠商會唔係好同意前會長嘅觀感，其發言人話，政府官員其實好畀面出席廠商會活動，好似上月初新一屆會董就職禮，煲呔曾同Rita都有去，工展會煲呔曾都有嚟主禮，Rita上個月亦有同新會長食飯，仲應邀做會董晚宴主講嘉賓；尹德勝約唔到Rita，可能只係時間上配合唔到啫！商務及經濟發展局發言人就話，局方向與商界保持緊密合作，相信一切只係尹德勝嘅誤會喎。