政情：劉鳴煒推動香港精神
作為華人置業集團嘅第三代、劉鳴煒嘅一對龍鳳胎當然係集億萬寵愛於一身啦，不過佢都唔主張一對仔女做飯來張口、衣來伸手嘅人，希望喺佢身上，睇到香港人自力更生嘅勇氣和精神。經過半年醞釀，最近劉鳴煒同香港青聯主席陳仲尼及立法會議員梁君彥囝囝梁宏正，仲一齊搞咗個「香港精神大使計劃」，希望從不同年齡、不同層面、不同界別選出香港精神大使，推動值得港人珍惜嘅香港精神。
咁乜嘢先係香港精神、邊啲人先做得香港精神大使呢？三位發起人都大賣關子，只知道活動主席為楊鐵樑，仲搵咗陳敏兒、林燕妮、蔡元雲等做評審。不過，凡事唔應該唾手可得，相信都係佢哋信奉嘅做人處事原則。
劉鳴煒本身係博士生，未夠廿歲就考到律師牌，仲係大企業嘅高層，鳴煒嘅生活就非常貼近大眾，好似佢啱啱返嚟香港嗰幾年，周不時畀人撞到佢坐地鐵返工；到太太生仔，仲同普羅巿民一樣去公立醫院分娩。由佢嚟講香港精神，多多少少都有啲說服力。上星期佢仲同太太孖住去睇《歲月神偷》，睇住一個家庭點樣面對逆境，完場後仲喊咗十五分鐘，絕對係性情中人。