政情：晒冷遏樓價楊家聲唱淡
本港樓價瘋狂飆升，無殼蝸牛怒轟政府壓抑樓市措施冇料到，立法會今日仲有議員提出活化二手居屋，重推首次置業計劃助港人上車嘅動議，搞到運輸及房屋局局長鄭汝樺（Eva）前日搶閘宣布，嚟緊一次過推售四千個居屋同夾屋貨尾單位。不過外界就批評呢個只係緩兵之計，對樓市降溫毫無幫助，就連房協主席楊家聲都忍唔住潑冷水，話睇唔到推售貨尾單位對壓抑樓價有乜幫助喎。
房協主席質疑成效
楊家聲身為房協主席，官方嘅講法當然話房協會配合政府嘅政策啦，之不過佢個人就質疑政策嘅成效。佢話，夾屋總共有七百幾個貨尾單位分兩批發售，即使加埋四千個居屋單位，數量都唔足夠應付目前嘅需求。
更重要嘅係，政府以為推售多啲單位就能夠令樓市降溫，楊家聲就點出政府嘅邏輯謬誤，因為夾屋同居屋都有入息限制，以夾屋為例，如果想申請夾居，單身人士嘅月入唔可以超過一萬九千五百元，家庭總月入則要介乎二萬三千元至三萬九千元之間，申請得嘅都係基層或者夾心階層人士，冇能力買私人樓宇，所以推貨尾樓對遏止炒風根本起唔到作用。
當房委會橡皮圖章
Eva拿拿臨拎四千幾個貨尾單位一次過晒冷，可能想喺今日立法會討論有關議題時有啲揸拿，唔會被議員問到口啞啞。不過，Eva掛住諗計應付立法會，搶閘公布出售居屋反而引起房委會委員不滿。
有房委會委員話，居屋同夾屋分別由房委會和房協負責出售，Eva公布有關措施時雖然有提到「建議房委會出售居屋」等用語，之但係佢講到實牙實齒，連細節點做都講埋，好似將房委會委員當成橡皮圖章，局方講咗就當拍板定案咁。Eva面對居屋呢個棘手課題難免顧此失彼，不過因為咁而越俎代庖，做法認真唔尊重房委會同房協嘅法定職權喇！