中環耳目：黃紹開愛翠亨邨老虎斑
要數中環正宗粵菜食肆，開咗三十幾年、坐落喺新世界大廈嘅翠亨邨相信榜上有名。卓妮早前見到啱啱升任副主席嘅大福證券董事總經理兼行政總裁黃紹開（Peter），佢正係翠亨邨嘅擁躉，經常幫襯佢哋肉滑鮮美嘅清蒸老虎斑。
大福證券原本係新世界集團成員，寫字樓就喺新世界大廈樓上。因地利之便，Peter經常喺度開餐，佢笑謂自己年紀大咗，要食得清淡啲，至緊要健康嘛，所以清蒸老虎斑成為佢哋嘅至愛。
翠亨邨中環分店鄧副經理話，佢哋啲老虎斑來自印尼、菲律賓東南亞海域，肉質有保證。條魚蒸得好唔好食，豉油最重要，鄧生話佢哋堅持用頭抽，再配以冰糖、雞粉調味，咁先至帶出條魚嘅鮮味。
Peter喺大福做咗廿幾年，係湊大間公司嘅最大功臣。大福原本係一間家族色彩濃厚嘅證券行仔，後來成功上市，又再用靚價賣盤，大股東淨袋十幾億現金。易主後Peter繼續受新股東重用，上星期更升任副主席，睇嚟都係睇中佢嘅「煉金術」嘞！