中環出更（一）：百周年校園奠基港大星光熠熠
中文大學為「光纖之父」高錕舉辦系列活動搶盡風頭，尋日輪到香港大學振聲威，舉行百周年校園奠基典禮暨慶祝本部大樓奠基一百周年，邀得黃麗松、王賡武、鄭耀宗、戴義安四位前校長撐場，亦覓得當年力撐港大成立嘅波斯裔印度商人麼地爵士（Sir H.N Mody）後人出席典禮，加上城中重量級富豪善長及名人舊生撐場，可謂星光熠熠，港大校長徐立之親自在場恭迎。
卓妮去到奠基典禮現場眼前一亮，名人嘉賓絡繹不絕，最有氣勢係恒基地產主席李兆基（四叔），佢聯同大女佩雯及孫女、囝囝家傑及家誠、得力助手林高演等人進場，其他嘉賓仲有新世界集團主席鄭裕彤、協成行方潤華、英皇集團主席楊受成夫婦、恒生銀行副董事長兼行政總裁梁高美懿、馬會主席陳祖澤、發展局局長林鄭月娥、前環境運輸及工務局局長廖秀冬等。
港大歷任校長中，以現年九十歲嘅黃麗松最老資歷，三八年入港大。佢憶述，當年港大好簡陋，只係後山一塊爛地，諗唔到發展到今日規模，佢期望港大向世界第一邁進。
四叔學堂命名留畀林高演
港大有今日規模，多得富豪善長支持；講到近年較支持港大發展嘅善長，非「四叔」李兆基莫屬。四叔○三年捐錢畀港大起宿舍，○七年再捐五億元畀港大，一半用作獎學金，另一半支持港大校園建設，呢筆係四叔捐畀海內外大學中最大一筆，港大為答謝四叔支持，將文學院會議中心及學堂以李兆基命名，但四叔惜才，將學堂命名留畀得力助手林高演。
卓妮