政情：志雲大師飲咖啡震驚政界
廉政公署虎年打老虎，尋日拘捕無綫電視總經理陳志雲，懷疑涉及貪污，涉嫌觸犯防賄條例。行政會議尋日舉行每月一度嘅Thursday Lunch（星期四午宴），出席嘅人都話對事件不知情，但獲悉陳志雲被捕後感到大為驚訝，包括上過《志雲飯局》做訪問嘉賓嘅港交所主席夏佳理（Ron）。
「咁大個台發生呢啲事」
阿Ron話，認識陳志雲好耐，又記得兩年前中環麗嘉酒店臨清拆前夕，曾與陳志雲到麗嘉錄影《志雲飯局》，但依家陳涉及廉署調查，佢不便評論太多。另一出席午宴嘅前行會成員范鴻齡，聽到陳志雲被捕消息後都好驚訝話：「係咩！咁大件事？咁大個台發生呢啲事，都算係大事！」
路過中環嘅立法會議員張宇人嘅反應一樣咁驚訝，佢話過去只係同陳志雲見過面，食過吓飯，無乜太大交情。議員劉秀成就以「震驚」來形容今次事件，佢只係記得兩年前到無綫電視城參觀數碼廣播設備時見過陳志雲，平時無乜來往，仲話廉署拉得人通常有證有據，睇怕陳志雲今次都好論盡。