政情：葉劉頻插高官有圖謀？

港府早前向立法會提出俗稱「強拍條例」嘅《土地（為重新發展而強制售賣）（指明較低百分比）公告》，建議將強行拍賣舊樓嘅業權份數門檻，由現時九成放寬到八成，希望可以加快市區重建進度，畀班泛民主派同部分舊樓小業主形容為「收樓廿三條」，質疑港府咁做係明益私人發展商同犧牲小業主權益，但似乎未能引起社會廣泛討論。

揶揄強拍條例

直至負責審議該項公告嘅立法會小組委員會上周一喺未經預告下，通過一項冇法律約束力嘅動議，要求港府撤回整條強拍條例，社會討論先至熱烈番些少。最有趣嘅係，呢次突襲行動並非由泛民策動，而係由分屬建制派嘅葉太提出。葉太日前更加事先張揚會刊登全版報紙廣告唱衰今次修例，揚言要「同煲呔曾玩鋪勁」。

該版廣告尋日正式出街，不過完全冇提到煲呔曾個名，甚至連強拍條例嘅全名或簡稱都見唔到，反而「林局長」個名就出現咗八次咁多，仲引用咗《聖經》撒母耳記下嘅著名比喻，指摘娥姐只顧方便發展商收樓，搶咗窮人唯一擁有嘅一隻小母羔羊，令佢哋變成一無所有，內容好有針對性。

葉太今次高調舉動，連同樣反對修例嘅泛民議員都為之咋舌，因為政府一早以為修例數夠票，葉太咁做簡單啲睇就係可以增加曝光，陰謀啲就難免令人聯想到係咪另有政治盤算。到底葉太今次係開邊瓣，真係得佢自己先知道。