中環出更：星雲寄語80後苦難當磨練
香港大學尋日頒發名譽博士學位，吸引多位政商界名人捧場，包括電視廣播有限公司董事利孝和夫人、基本法委員會副主任梁愛詩、行會成員梁智鴻伉儷、中大候任校長沈祖堯等，場面星光熠熠。咁多位獲扑頭頒發名譽博士學位嘅傑出人士之中，最矚目莫過於有「政治和尚」之稱嘅星雲大師嘞。面對近期相繼有香港大學生自殺，星雲大師寄語一眾「八十後」青年要懂得將苦難當成學習機會，努力奮鬥，創造自己嘅人生！
星雲大師當年有份協助逃亡到美國的前新華社香港分社社長許家屯，曾經轟動一時。尋日佢就話，件事已係廿幾年前嘅事，許家屯今日已經係一個九十幾歲嘅老人家，希望社會各界可以祝福佢。對於外界冠以佢「政治和尚」嘅稱號，八十有四嘅星雲大師唔介意，仲好玄咁話：「外界說我做政治和尚很好，說我是教育和尚也很好，說我是媒體或弘揚佛教的和尚也可以；像我這樣的人，你怎樣說也可以。」
今日嘅星雲大師，經常往返海峽兩岸，佢形容兩岸關係好似兩兄弟咁：「香港、台灣、澳門同中國不是兩個，是一個，都是一家人。」
與楊雪姬同獲名譽博士
除星雲大師外，尋日獲頒名譽博士學位嘅仲有電飯煲之父蒙民偉前妻楊雪姬，囡囡蒙倩兒、囝囝蒙德揚（David）同較少露面嘅蒙德勳（Stephen）都現身撐媽咪。楊雪姬早年有份幫前夫打造電器王國，之後仲以六十五歲高齡入讀港大修讀心理學，其後唔單止發表多篇著名心理學研究，仲捐大筆研究經費畀港大，每年又支持多名港大學生到劍橋同牛津等著名學府留學。
蒙德揚尋日話畀卓妮知，今次佢以港大校董身份出席媽咪嘅學位頒授典禮，特別興奮，完咗儀式後一家人會返屋企食飯慶祝。
利孝和夫人都有出席典禮，但笑笑口唔肯答嚟捧邊個場。問到無綫電視總經理陳志雲被廉署拘捕一事，佢仲耍手擰頭，話喺呢啲咁開心嘅情況下，唔好講呢啲嘢喎！
卓妮