僭建招牌渠署懶理
明渠欄杆遭僭建招牌架逾年，渠務署竟然視若無睹。元朗居民陳小姐發現，昌盛徑明渠欄杆被附近商店僭建逾十個鐵架，用以裝設招牌或支撐帳篷，接近兩年仍未被部門取締，「真係離晒譜，啲招牌好似旗海咁，有乜理由會冇政府部門監管！」陳促當局正視問題，還居民一個整潔社區。
「渠務署淨係掛住搞啲去水渠排水、有冇水浸，最多就做埋去水渠綠化，啲欄杆畀人僭建就睇唔到，依家仲愈嚟愈嚴重，真係好有問題！」元朗區議會地區設施管理委員會委員周永勤建議渠務署加強巡查轄下排水設施，如發現有違規僭建，須即時跟進。
渠務署發言人則稱，將聯絡有關商戶，促移除上述物品，倘勸喻無效，該署會要求有關部門發出清理告示，以便安排清理行動。