政情：蔡菜子山西圓天鵝夢

蔡菜子同我哋講，大約五年前，佢喺飛機上睇報紙，知道每年冬天都有唔少天鵝南下到芮城過冬，嗰度好似世外桃園，自此念念不忘。咁啱舊年港區人大去山西考察，蔡菜子就同嗰邊山西嘅朋友講，如果啲天鵝南下到嚟，即刻打電話通知佢。果然蔡菜子今年一月就收到電話，即刻拿拿臨買機票上去，一圓佢嘅「天鵝夢」嘞。

蔡菜子形容冬天嘅芮城之旅真係「正到無倫」，事關嗰度有數平方公里一望無際嘅濕地，有過二萬隻天鵝喺度飛，場面好壯觀，睇到佢「嘩嘩聲」。蔡菜子又話佢住嗰間酒店係當年大禹治水嘅舊址，亦喺正黃河岸邊，企喺露台時就好似企喺黃河上咁，別有一番風味。唯一美中不足，就係當時河水結晒冰，無法感受河水嘅氣勢。

蔡菜子圓咗佢個「天鵝夢」後，並冇就咁算數，仲主動聯絡世界自然基金會，希望可以幫芮城向聯合國申請番個「Ramzar濕地保護基金」添，認真有心！